Assegn di maternitât
L' assegn al è stât istituît dal art. 66 de leç n.448/98 cun efiet dai 01.01.1999 e vuê al è regolât dal D.P.C.M. dai 21 di Dicembar 2000 n.452 e dal art.74 dal D.Lgs.151/2001 (Test Unic des disposizions legjislativis in materie di tutele e sostegn de maternitât e paternitât).
L’assegn al tocje, par ogni fi nassût, aes feminis che no gjoldin di nissun tratament economic pe maternitât (indenitât o altris trataments economics a caric dai datôrs di lavôr privâts o publics), o che a gjoldin di un tratament economic di impuart plui bas rispiet al impuart dal assegn (in chest câs l'assegn al spiete pe cuote diferenziâl).
Aes stessis condizions, il benefici al ven dât par ogni minôr in adozion o afidament preadotîf, baste che il minôr nol vedi superât i 6 agns tal moment de adozion o afidament (ven a stâi la etât maiôr in câs di adozions o afidaments internazionâi). Il minôr in adozion o in afidament preadotîf al à di vivi e jessi resident tal teritori dal Stât.
CUI PUEDIAL DOMANDÂ
A puedin presentâ domande lis maris:
- citadinis talianis
- citadinis comunitariis
- citadinis extracomunitariis cun cjarte di permanence
(nol baste il permès di permanence ancje se dât par une reson che e permet un numar indeterminât di rinovazions); ta cheste ipotesi, ancje il fi che nol è nassût in Italie o che nol risulte jessi citadin di un Stât de Union Europeane, al à di vê la cjarte di permanence.
La mari che e fâs domande e à di jessi residente tal teritori dal Stât talian tal moment de nassite dal fi o al moment de jentrade inte sô famee anagrafiche dal minôr in adozion o in afidament preadotîf.
RECUISÎTS DI REDIT
Pal an 2010, il valôr dal I.S.E., cun riferiment aes fameis di trê components, al è di € 32.448,22.
CUANT E DULÀ PRESENTÂ LA DOMANDE
La domande e à di jessi presentade al Comun di residence de mari prin de scjadince perentorie di sîs mês de nassite dal fi.
Tal câs di adozion o afidament preadotîf la scjadince di sîs mês e partìs de date de jentrade dal minôr inte famee anagrafiche de femine che lu cjape in adozion o in afidament.
CONCESSION E MISURE DAL ASSEGN
L'assegn al ven dât cun disposizion dal Comun e al è paiât dal INPS. L'impuart dal assegn al è determinât cun riferiment ae misure mensîl in vore ae date dal part o de jentrade in famee dal minôr. In particolâr pai events che a si son verificâts tal an 2010 l'impuart mensîl dal assegn al è di 311,27 euro par un impuart totâl di 1.556,35.
L'assegn dal Comun nol pues jessi ricognossût se al è stât dât dal INPS l'assegn di maternitât dal Stât daûr dal art. 75 dal D.Lgs. 151/2001 (bielzà art. 49, come 8, de leç n. 488/99).