Ativitât comerciâl

 

Procediments e documentazion a cambiin daûr de tipologjie de ativitât (cumierç in sede fisse, cumierç su areis publichis, public esercizi), dal setôr des marcjanziis (alimentârs/no alimentârs), des dimensions dal locâl. 

CUMIERç IN SEDE FISSE 

La L.R. n. 29/2005 e diferenzie lis buteghis daûr de grandece de lôr superficie di vendite, ven a stâi : 

  1. la viertidure, l'ampliament o il trasferiment di un esercizi di vendite al detai di vicinât (superficie di vendite fin ai 250 mc) e di "medie struture minôr" (cun superficie di vendite jenfri i 250 mc e i 400 mc) a son sogjets a denunzie di principi di ativitât (DIA).
  2. i esercizis di "medie struture maiôr" (cun superficie di vendite plui grande di 400 mc) a son sogjets a autorizazion dal Comun.

 RECUISîTS: L’esercizi de ativitât comerciâl di prodots no alimentârs al è subordenât al possès dome dai recuisîts morâi indicâts al art. 6 de L.R. 29/2005. Invezit l'esercizi de ativitât comerciâl di prodots alimentârs, e ancje la soministrazion di aliments e bevandis, al è subordenât al possès di un dai recuisîts professionâi indicâts al art. 7 de L.R. 29/2005.

CUMIERç SU AREIS PUBLICHIS 

Il cumierç su areis publichis al è sometût ae autorizazion preventive e al è permetût dome aes ditis individuâls e aes societâts di personis. Cui che al à intenzion di esercitâ il cumierç su aree publiche al à di vê i stes recuisîts morâi previodûts pal esercizi dal cumierç al detai in sede fisse e dal câs ancje i recuisîts professionâi daûr che a si trati di cumierç di prodots alimentârs. 

La autorizazion al cumierç su aree publiche par mieç dal ûs di un puest e je dade dal Comun sede dal puest e e abilite ancje al esercizi in forme itinerante dentri dal teritori regjonâl.

SOMINISTRAZION DI ALIMENTS E BEVANDIS 

L’esercizi de ativitât di soministrazion di aliments e bevandis (bars, ristorants, pizariis) al è subordenât al possès dai recuisîts morâi previodûts dai articui 11,12 e 92 dal TULPS e dal articul 6 de L.R. 29/2005. A coventin ancje recuisîts professionâi (vê frecuentât i cors daûr dal art. 8 de L.R. 29/205 o vê fât une esperience almancul di doi agns intal stes setôr o vê un diplome di scuele medie superiôr o lauree o diplome di scuele alberghiere).

La viertidure di un esercizi di soministrazion di aliments e bevandis e je subordenade ae osservance de conformitât dai locâi rispiet aes normis edilizis, urbanistichis, igjenichis e sanitaris, e ancje aes disposizions pe prevenzion dai fûcs e a chês in materie di publiche sigurece dai locâi. 

La viertidure di un esercizi di soministrazion di aliments e bevandis e je subordenade ae autorizazion; par subentrâ e baste la denunzie di inizi di ativitât.

Pe modulistiche relative, domandâ al ufici segretarie dal Comun (tel. 0434 89210 interni 0).