La viere glesie de parochie di San Lurinç e je une des plui bielis glesiis chi ator. Cun chê di Voleson (Sants Pieri e Pauli), chê di San Martin (Sants Jacum e Filip) e chê di Darzin (Sante Margarite) e lasse un segn di vere devozion, di art e di storie tacant dal 1500. Dal sigûr, a esistevin dutis ancje prime, ma in chei agns a son stadis slargjadis e fatis plui bielis cun gnûfs altârs e gnovis pituris religjosis.
Il taramot dal 1976 al à fat malans tai nestris paîs cence sparagnâ lis glesiis. Ancje cheste glesie di San Lurinç e à vût lis sôs creturis e roturis. Par sistemâ chel che il taramot al veve ruvinât e je stade fate une sistemazion dai mûrs e dai locâi (sagristie, cjampanili) ritocjant e restaurant ancje lis pituris par dentri. La glesie, un tic fûr dal centri, e merete jessi visitade par sô bielece e par la storie che e conte.
