Un dai plui biei curtîi di chi ator al è chel dai Rafins. Grant e larc al jere cenglât di cjasis e di stalis. Cusinis, seglârs e stanziis, cantinis e piçui camarins a jerin tal plantiere; par lâ intes cjamaris disore si passave pal puiûl di len. Une volte intes cjasis a vivevin tantis fameis e la vite e jere movimentade di tante canaie, dai lavôrs e des tantis personis che si messedavin impegnadis in chest piçul mont.
Lis cjasis di chest curtîl a son stadis sistemadis metint in mostre ducj i lavôrs e i materiâi che une volte a jerin doprâts cun abilitât e inteligjence. Il sotpuartin, delimitât di colonis di piere, al è segn di une cjase impuartante. Ancje il spazi sore il sotpuartin, une specie di grant puiûl cuviert e limitât di piçulis colonis, al è une carateristiche no solite inte nestris cjasis.