La borgade "Cià di Sot" cu la glesie dedicade a Sante Margarite. Si viôt come che a jerin la plaçute e lis cjasis che a fasin cjanton denant ae strade che e puartave a Darzin e San Lurinç. A man drete, intune bande de nicje, une des tantis pituris religjosis che a son tal nestri paîs. Sot la glesie, a man çampe, si traviôt la pompe di "Cià di Sot". Dutis lis cjasis a jerin stadis costruidis tor dal 1500 cui claps dal Tiliment e dal Midune.
Inte borgade di "Cià di Sot" si fâs simpri riferiment ae gleseute di Sante Margarite. I vielis a contin che, une volte, sot l'altâr al partive un varc sot tiere che al colegave il cjistiel di Voleson ae nestre gleseute e che al lassave scjampâ i conts in campagne cuant che a jerin pericui seris tal lûc nobiliâr.
