Une part impuartante de nestri paîs al à vude la Scuele di Infanzie. Dal 1950 fin a cualchi an indaûr al è stât il sît fat a pueste pe educazion e a servizi dai fruts prin che a ledin a scuele. Al insegnament, al fâ di mangjâ e a conduzion de struture a si son dedicadis soredut lis "Muiniis Canossianis" che cun grant spirt di servizi e grancj sacrificis a àn lassât une prove di voie di lavorâ e di dedizion. Chê che o viodês disore e je la prime struture realizade.
Intitulade a "Giovanni e Matilde Pagnucco", la Scuele di Infanzie e tignive ducj i fruts dal paîs e ancje cualchidun di fûr, pe grande disponibilitât des muiniis sui oraris di principi e fin des lezions. Tal timp, tantis voltis a son stâts fats dai lavôrs par slargjâle e fale plui biele par podê ospitâ tancj fruts, fâus mangjâ e durmî, lassâju zuiâ e ancje par fâur scuele. Finît il servizi come Scuele de Infanzie i locâi a son deventâts un puest di incuintri pe comunitât.
