La vecje glesie viodude di Vie Glesie, inte fin dai agns '40, prin che e fos butade jù. La cartuline e je stade impuestade ai 14 di Zenâr 1954. Si viôt ancjemò la pompe, ma il poç di piere za nol è plui. A man drete la roie e passave pal paîs, dulà che lis feminis a lavavin i vistîts. Dentri de roie si cjatavin pessuts, sanguetis, crots e gjambars. A man çampe si viôt la jentrade dal "Cine Teatri Excelsior".
La borgade de "Glesie" come che e je cumò. Ator dal edifici che al da il non ae localitât, lis cjasis a son stadis ristruturadis par rispuindi aes dibisugnis modernis de int; lis cjasis dai "Pavans" a son stadis sistemadis o butadis jù e tal lôr puest a son stâts fats sù condominis modernis. Il cjampanili al è stât costruît tal 1985. Fat in ciment armât, al domine dut il paîs; di parsore si puedin viodi i paîs e i cjamps ator.
