Art e Culture
Lis oparis di art di plui grande impuartance a son chês conservadis in chê che e jere la glesie de parochie di une volte di Darzin, la glesie di Sante Margarite, nobilitade soredut de presince di une piture a vueli dal santvidot Pomponio Amalteo. Cence sei une vore mestre, la tele, databil dal 1555 e che e rafigure S. Margarite jenfri di S. Sebastian e S. Roc, e mostre lis grandis abilitâts dal pitôr che inte predele al ilustrà cun gust trê fats dal martueri di Sante Margarite.
Inte glesie, che e à subît tancj intervents intai secui e e somee un edifici votîf di grandis dimensions cuntun cjampanili a vele, indi son pituris a fresc dal inizi dal XVI secul cun Sants (pituris popolârs, fermis e blocadis) e altris dal inizi dal sîscent (Anunciazion, Apuestui), plui ariôs e atribuîts al Pordenonês Gasparo Narvesa. Inte glesie de parochie di San Michêl, costruide di pôc, un piçul altâr di len intaiât, l’altâr maiôr di marmul cun statuis dal venezian Giovanni Caribolo (1689), un tritic che nol emozione di Giuseppe Moretto di San Vît dal Tiliment cui Ss. Zuan Batiste, Michêl Arcagnul e Margarite (prins dal Sîscent) e une Madone cul Frutin e Sants atribuide a Gasparo Narvesa (XVII secul). Inte Parochie de frazion dongje, che di San Lurinç, si à di impensâsi dal altâr di marmul di S. Josef fate in forme pluitost baroche di Giacomo Pischiutti di Glemone intal 1796.
E je interessante la glesie di Sante Margarite, glesie de parochie di une volte, che e je stade rifate plui voltis dal XI al XVIII secul. Si cjatin oparis di P. Amalteo e G. Narvesa. La glesie di vuê de parochie di S. Michêl e conserve oparis di une glesie plui viele dal XV secul, la font dal batisim dal 1534, la pile de aghe sante, une pale di Narvesa dal 1590, un altâr di len dal XVII secul, l’altâr maiôr baroc di G. Caribolo.