Simpri de zone de glesie si viôt Vie de Glesie. La cartuline e je dai prins dal 1900. E je tipiche no dome di Darzin ma ancje di altris zonis la disposizion, di fate antighe, des cjasis che a son metudis une tacade di chê altre, cu la façade voltade viers misdì par sfrutâ dut il soreli. E merete cjalâ cun atenzion la fasse blancje che si note su dutis lis cjasis, forsi pe cjalcine doprade cuintri la afte o altris malatiis des bestiis.
Ancje cheste vie e à subît tantis variazions cu la sistemazion e l'amodernament des cjasis. Si pues viodi benon la carateristiche des abitazions metudis une tacade di chê altre. Cheste file di cjasis e rive a Cià di Sot e si distachin dome pocjis voltis. Sul denant de prime cjase si viôt une piture a fresc, fate tal 1861, che e rapresente la Santissime Trinitât. I colôrs a son daûr a smavî par vie dal passâ dal timp e des intemperiis.
