Chestis cjasis a son stadis sistemadis cualchi an indaûr e a son deventadis "cjasis popolârs". A jerin une vore vieris: si pues dî che a jerin stadis costruidis tor dal 1500. Il puarti al jere segnât di tancj arcs che a devin lûs aes stanziis al plantiere. Disore al jere un coridôr che al puartave aes cjamaris e ancje al solâr. Tal mûr dal sotpuarti e je une biele piture a fresc che e permet di sigûr di dâ une date ae cjase.
A chestis abitazions e je stade fate une buine ristruturazion: ancje se e je stade cambiade la division dai spazis par dentri, la tipologjie e la architeture origjinâls a son stadis salvadis dal dut. Tai nestris paîs tantis cjasis a meretavin di jessi sistemadis tignint cont de maniere e dai materiâi di fabricazion; pecjât che dispès si è preferît butâ jù dut e tornâ a costruî in maniere moderne cence tignî cont dal puest e de maniere che si costruive une volte.
