Comune di Gonars

Il steme di Gonârs al è stât concedût tal 1937 suntune domande dal Comun dal 1935. A son rapresentadis dôs bolps che si rimpinin suntun arbul metût su di un prât. I trê elements – lis bolps, l’arbul, il prât – a vevin chê di jessi un riferiment ai trê borcs che a costituissin il Comun, daûr di cualchi ricostruzion toponomastiche che po no son risultadis dal dut justis. A part il toponim Antognan, cence dubi un prediâl che al rive dal non Antonius, chei altris doi toponims, Gonârs e Favuîs, no son tant facii di interpretâ e tal timp a son stadis formuladis ipotesis diferentis. Par cumò, lis ipotesis plui probabilis a somein jessi par Gonârs une origjin gjermaniche, forsit dal non langobart Gunnar o Ghanart e par Favuîs une derivazion dal latin moderni Favulles, diminutîf di “favis”, parcè che e je propit in cheste forme che al ven fûr par la prime volte tal 1200. Il document plui vecjo che al ateste la esistence da la vile di Gonarium al è dal 1031, ma, par vie di un erôr di trascrizion, plui tart il vecjo toponim al someà jessi Ganarium, non che al podeve vê la sô origjin tal bas latin “gannire”, ven a stâi la vôs da la bolp. Cheste interpretazion e motivà la domande dal Comun di Gonârs di meti dentri dôs bolps tal steme. Invezit l’arbul, un faiâr, al rapresente la frazion di Favuîs: ancje in chest câs, la sielte dal faiâr e fo condizionade da la interpretazion toponomastiche, che cumò e je in dubi, che e diseve che Favuîs al podès vignî di “fagus, fagulium”, che al vûl dî faiâr. In fin, il prât al fâs riferiment al “praedium Antonianum”, ven a stâi il teren concedût al colon roman Antonius.