Comune di Gonars

La Zonte comunâl e à aprovât il manuâl di imagjin coordenade dal Comun cun deliberazion n. 41 dai 22.03.2007.
Il manuâl di imagjin coordenade al è l’imprest che un ent al dopre par definî e regolâ l'ûs dai elements doprâts tes comunicazions: il steme dal Comun, il logo, la impostazion grafiche des bustis e da la cjarte intestade, e v.i. cun chê di dâ une rapresentazion dal ent eficace e subite ricognossibile.
Tal câs dal Comun di Gonârs, la bisugne di un studi di imagjin e je stade obligatorie ta la ocasion di cualchi progjet di valorizazion da la lenghe furlane, finanziât daûr da la L. 482/99 "Normis in materie di tutele da lis minorancis linguistichis storichis". Di fat i progjets finanziâts a previodevin la definizion e la realizazion di diferents imprescj di comunicazion bilengâl ai citadins. Une impostazion grafiche che no fos buine di rilevâ il bilinguisim e varès creât dificoltâts di leture des comunicazions, complicât i rapuarts di comunicazion dal ent cui citadins e di conseguence svilît il messaç di democrazie e di partecipazion che al è a la font da la L. 482/99. Par chest, la Aministrazion comunâl di Gonârs e à decidût di dedicâ, dentri dai progjets di valorizazion da la lenghe minoritarie, une atenzion specifiche ai elements grafics da la comunicazion, afidant al Sportel linguistic furlan la incarghe di seguî il studi di imagjin coordenade curade di Ekostudio di Udin.
Chest studi al à rilevât ancje la oportunitât di tornâ a viodi il steme comunâl, par rindilu plui adat a rispuindi a lis esigjencis di riproduzion, leibilitât e funzionalitât.