Il borc furlan

L’asset dai borcs furlans al à origjin tal secul XI cu la colonizazion patriarcjâl. I patriarcjis a intervegnin sul model feudâl di prime rinovantlu e adatantlu a lis lôr esigjencis. Di chê volte e fin a la metât dal secul passât, il Friûl, ancje se al patìs tantis invasions e dominis forescj, al costituìs une realtât isolade: lis azions che a rivin dal forest, se a son, a son debilis e tardivis al pont di no puartâ cambiaments sostanziâi al model origjinari, che duncje al reste chel patriarcjâl.

La organizazion teritoriâl furlane e je radiâl, daûr dal grât di ativitât antropiche, che e cale a man a man che si slontanisi dal centri - il borc - viers la perifarie. Il borc al è formât da la agregazion des sengulis unitâts abitativis, di solit avonde omogjeniis, che si inlinein in maniere compate ai doi lâts da la strade, che e devente l’element di agregazion. Dutis lis unitâts a cjapin dentri une cort interne, centri des ativitâts familiârs, che e je un spazi discuviert di tiere batude, centât par protezi i nemâi di curtîl che a son arlevâts; ator a la cort a son un edifici doprât in part tant che abitazion, in part tant che stale e dipuesit, e une braide o bearç, ancje chê centade cuntun mûr bas par che i nemâi di curtîl no ledin dentri, doprade par coltivazions intensivis (verdure, vîts, pomis), di solit metude di chê altre bande rispiet a la strade. Plui indenant a son i cjamps e po, ancjemò plui lontans dal borc, prâts, pascui e boscs. I edificis a son simpri a nord e a est da la cort par otimizâ la esposizion solâr. Duncje, daûr dal orientament des stradis, lis cjasis a puedin jessi inlineadis in maniere compate a formâ une cortine continue; in chest câs a àn ancje un puarton pluitost larc par il passaç di cjars e nemâi.

Favuîs, vie IV Novembar. La strade e va di est a ovest e chest al è il prospet des cjasis bande sud. In chest câs, lis corts si metin a sud des cjasis e duncje daûr di lôr. Viers la strade, duncje, lis cjasis a son inlineadis intune cortine continue. La jentrade di cjars e nemâi tes corts internis al è pussibil parcè che a son larcs puartons.
Antognan, vie Liberazion, bande sud
Antognan, vie Palme, bande sud

In altris câs, l’inlineament su la strade al è une composizion alternade di cjasis e corts e il passaç viers l’interni al è gjavât fûr ta lis muris da la cort.

Favuîs, vie IV Novembar, bande nord. In chest câs, no si pues meti lis corts a sud des cjasis, parcè che a saressin denant di lôr su la strade. Duncje, par garantîsi une buine esposizion di soreli, si metin a ovest dai edificis. Par vie dal fat che la strade e va di est a ovest, la cortine no je continue, ma e je une alternance di cjasis e muris des corts.
Favuîs, vie Aquilee. La strade e va di nord a sud e chest al è il prospet da lis cjasis bande est. Lis corts a son metudis a sud da lis cjasis e duncje la cortine su la strade e je componude di edificis e muris alternâts.
Favuîs, vie Aquilee, bande ovest. In chest toc lis corts a son metudis a ovest da lis cjasis che dungje a puedin costituî une cortine compate su la strade.

Dut câs, in ducj chei altris câs, l’unitât da cort e je caraterizade di une sierade bande la strade, cun evidents fins di difese. Lis unitâts abitativis si vierzin mancul pussibil viers la strade il e lis viertiduris a son protezudis di portons, buchetis e gatars. Invezit, bande da la cort interne, invezit a son lozis, puiûi, scjalis e puartis.

Riferiments bibliografics:

Friulabio / Luciano Di Sopra. - [Udine] : Casamassima, 1989

La casa rurale nel Friuli / Emilio Scarin. - Firenze : CNR, Comitato nazionale per la geografia, 1943