Lis popolazions
Fin dai timps plui lontans il Friûl al è un pont di incuintri di plui civiltâts parcè che al è facil rivâ sedi di nord, sedi di est. Lis popolazions che a passin o che si fermin in chest teritori a lassin segns di culture une vore diferents che dispès no son evidents e nol è facil interpretâju.
Tra i prins abitants de regjon furlane a son i Paleovenits, une popolazion di origjin indoeuropeane: la liende e conte che a fossin in Asie minôr dal secul X prin di Crist e che, vuidâts dal esul troian Antenor, a vedin fondât Padue. A son di une vore in colegament cui Etruscs, stant che a doprin il lôr alfabet e la lôr numerazion. No si è sigûrs però che ancje il Friûl al fasès part di chel teritori padan concuistât dai Etruscs par comerciâ cui Celtis i prodots puartâts dai Grêcs. Cualchi storic al pense che i Paleovenits no si sedin insediâts in maniere stabile in Friûl, al contrari, te aree lassade vueide dai Paleovenits si saressin stabilîts i Celtis tra i secui V e III prin di Crist. La presince in Friûl dai Celtis, une popolazion indoeuropeane che si è stabilide un pôc in dute Europe, e je contemporanie a chê dai Paleovenits e al samearès che la uniche grande diference tra lis dôs civiltâts e fos la lenghe. Il non "Celtis" al è di origjin greghe (al ven di keltoi), ma e jerin clamâts ancje Galatai intant che i Romans ju clamavin Galli. La tribù presinte te zone montane dal Friûl e je chê dai Carnis.
Intal periodi protostoric i Celtis a son la popolazion che e à plui insediaments in Europe: a tegnin un teritori che al va dai Balcans al mâr dal Nord, aes isulis britanichis, ae Italie setentrionâl. Ma lis testemoneancis celtichis in Friûl a son, tal complès, raris e la lôr interpretazion e je malsigure, tant che nol è clâr nancje cuale che varès vût di jessi la tipologjie dai lôr insediaments. Cualchidun al pense che al sedi plui probabil che i Celtis a vedin traviersât cheste zone par motîfs comerciâi ma che no si sedin insediâts in maniere stabile. I rescj di manufats che a van indaûr ae Ete dal Fier recuperâts tal cjastelîr di Palaçûl e in altris lûcs al è pussibil che a sedin di origjin paleovenite plui che celtiche.
Riferiments bibliografics:
La lingua venetica / G.B. Pellegrini, A.L. Prosdocimi. - Padova : Istituto di glottologia dell'Università, 1967
L’arco adriatico fra preistoria e leggenda / A. Grilli
In: Preistoria e protostoria dell'Alto Adriatico : [atti della XXI settimana di studi aquileiesi, 21-26 aprile 1990]. - Udine : Arti grafiche friulane, 1991
Kurm : ipotesi e riscontri sulla presenza dei celti e di altre popolazioni preromane nella Bassa friulana / a cura di Roberto Tirelli ; con presentazione di Gianfranco Ellero. - Latisana : La Bassa, 2002