Comune di Gonars

La colonizazion de Basse furlane di bande dai Romans e tache cu la fondazion di Aquilee romane, ven a stâi tal 181 prin di Crist. Il storic Tît Livi al spieghe cualis che a son lis resons dal intervent roman in cheste zone. Al conte che tal 186 prin di Crist i Celtis Transalpins a ciririn di fondâ une citât in chescj teritoris. Tal 181 prin di Crist Rome e mande 3.000 colons par fondâ la gnove citât; tal 169 a ‘nd mande ancjemò 1.500. Intant, par assegnâ i terens ai gnûfs colons, i Romans a scomencin a dividi il teritori in maniere gjeometriche. Tal secul II prin di Crist la planificazion plui doprade e je la centuriazion, ven a stâi la division dal teritori su la fonde di un implant di stradis paralelis aes dôs stradis principâls de citât, il cardo e il decumanus, perpendicolârs tra di lôr. L'implant stradâl al forme une rêt di cuadrâts o retangui. La centuriazion de Basse furlane presinte in tancj elements topografics, ducj cul stes orientament, e à une inclinazion diferente di chê di Aquilee; chest al fâs pensâ a une planificazion largje e specifiche pe Basse furlane, dal Tiliment al Lusinç, ai teritoris de Medie planure a nord de Stradalte.

Plui tart i Romans a tacarin a costruî lis stradis. Forsit fin in chê volte si doprave cualchi strade protostoriche: te zone che vuê e corispuint al comun di Gonârs e passave une strade (te figure e je segnade tant che "Stradalte protostoriche") che e leve dilunc de linie des risultivis. Une altre strade, che e coreve dilunc il Cuar, e tocjave Ad Undecimum (vuê Cjarisà) e leve indevant ancjemò par dividisi cuntun ram bande Favuîs e un bande Gonârs, di dulà che e leve indevant viers Cividât, passant la Tor a Percût.

Tal 156 o tal 153 i Romans a costruissin la vie Annia, che e colegave Iulia Concordia (Concuardie) cun Aquilee, passant par Palaçûl, Muçane, Ziline, Ad Undecimum, Malisane e tal 148 la vie Postumia, che e tacave Gjenue cun Aquilee, passant par Opitergium (vuê Oderzo) e po dopo e passave il Tiliment salacor dongje Codroip e e lave indevant daûr de linie de Stradalte fin che si tacave cul cardo de centuriazion aquileiese a Sevean.

Riferiments bibliografics

Palma e la Bassa friulana / C.G. Mor. - p. 11-20
In: Palme : 53n Congres, 26 setembar 1976 / Societât Filologjche Furlane. - [Udin : Societât Filologjche Furlane, 1976]

Viabilità e centuriazioni nella pianura aquileiese / F. Prenc. -  p. 43-58
In: Cammina, cammina... : dalla via dell'ambra alla via della fede / a cura di Silvia Blason Scarel. - Aquileia: Gruppo Archeologico Aquileiese, 2000