La Stradalte
Dilunc de linie des risultivis a jere, forsi za te ete dal Bronç, une strade che a puartave di 'Sevean al Tiliment; a cheste strade a rivavin altris viis perpendicolârs ae cueste. E seguive une linie plui basse de linie dai paîs di cumò e e tocjave il cjastelîr di Cjasteons di Strade. Daûr di une des ipotesis fatis, la stesse strade e fo po dopo doprade dai Romans tal 148 a.C. pe costruzion de Postumie, che e tacave Gjenue cun Aquilee, passant par Opitergium (vuê Oderzo) e po dopo e passave il Tiliment salacor dongje Codroip e e lave indevant daûr de linie de Stradalte fin che si tacave cul cardo de centuriazion aquileiese a 'Sevean.
Daûr di une altre ipotesi, invezi, la Postumie di Oderzo si tacave con Concordia, par lâ indevant dopo bande Aquilee e jessi dut un cu la Anie.
Il non Stradalte, dut câs, al ven dât a une strade che e je plui a nord de strade Anie (daûr de prime ipotesi) o de Postumie (daûr de seconde).
La funzion de Stradalte e jere soredut militâr e no tant di colegament tra i centris abitâts; cheste strade, di fat, no travierse i centris abitâts, come che a fasin invezi altris stradis romanis che a deventin la arterie principâl dai centris che a passin. I paîs che a son dilunc de Stradalte, di fondazion pal sigûr romane come che a disin i lôr nons di origjin prediâl (Antognan, par esempli, e po dopo Mortean, 'Sevean, Morsan, …), a son in linie con je, ma a restin di fûr.
Forsi e veve ancje funzions comerciâls, o almancul di control militâr a viis comerciâls. La zone a nord de Stradalte e jere ancjemò controlade un pôc dai Paleovenits, di simpri aleâts cun Rome, e di chê altre bande des Alps a jerin i Norics, che a vevin bogns rapuarts comerciâi cui Romans. Partant, e podarès ancje jessi che cheste strade e fos doprade par tacâsi cul nord par motîfs comerciâi.
La Stradalte e divideve dôs zonis centuriadis di prime, chê plui a sud dade ae agriculture, chê a nord al pascul, e e faseve di passaç pes greis dal nord bande Aquilee: une iscrizion cjatade a Aquliee e fasarès apont riferiment ae necessitât di un racuardi des viis tra la Postumie, in chest câs di intindi come Stradalte, e la citât pal passaç des greis.
La Stradalte po dopo e deventâ la vie preferide par chei che a vignivin di orient, forsi parcè che e jere unide ae vie che vignive di Lubiane. Di fat, e je propi midiant cheste strade che i Langobarts a jentrin in Friûl; lis sapulturis e i cimitieris langobarts cjatâts dilunc cheste vie, che van indaûr fin dai secui VI o VII, dongje di sapulturis di popolazions dal lûc, a dimostrin che ta chê volte cheste strade e veve cjapât il puest de Anie te funzion di colegament tra orient e ocident.
Po dopo, ven a stâi tal secul IX, cheste strade e ven doprade ancje dai Ongjars tes lôr scorizadis, tant che si le cognòs ancje come "strata Hungarorum", e po dopo "Ongjarescje". Ancjemò vuê la strade provinciâl che e va di Codroip bande est traviersant Bertiûl, Cjasteons, Gonârs e je clamade "Ungariche". Pal stes motîf la doprarin ancje i Turcs tal secul XV.
Dopo, e fo doprade e forsi ancje metude a puest variis voltis, prime dai Venezians, cuant che a àn fat su Palme (1593) e dopo dai Francês e propi di chescj e à cjapât il non di "Napoleoniche" doprât ancjemò. Infin, e fo ricostruide tai agns Sessante dal secul passât, su la fonde di une ferade mai fate, che e varès vût di tacâ Palme cun Codroip.
Riferiments bibliografics
Le strade del territorio di Aquileia tra tarda antichità e alto medioevo / Chiara Magrini
In: Cammina, cammina... : dalla via dell'ambra alla via della fede / a cura di Silvia Blason Scarel. - Aquileia: Gruppo Archeologico Aquileiese, 2000. - p. 164
Palma e la Bassa friulana / C.G. Mor
In: Palme : 53n Congres, 26 setembar 1976 / Societât Filologjche Furlane. - [Udine : Società Filologica Friulana, 1976]. – p. 11-20
Viabilità e centuriazioni nella pianura aquileiese / Fabio Prenc
In: Cammina, cammina... : dalla via dell'ambra alla via della fede / a cura di Silvia Blason Scarel. - Aquileia: Gruppo Archeologico Aquileiese, 2000. - p. 43-58