Comune di Gonars

Tal 410 i Gôts di Alarì a botinarin Aquilee che vie pai prins secui dal imperi e jere la plui grande citât romane setentrionâl, dispès visitade dai imperadôrs. Tal 452 i Uns di Atile le distruzin. Cuant che tal secul VI daspò di Crist a rivarin i Langobarts, la sô supremazie e jere aromai lade al mancul. I Langobarts a jerin une popolazion di origjin scandinave e a rivarin in Gjermanie setentrionâl vie pe ete imperiâl (il storic latin Velei Patercul al à vût fevelât di lôr tal 5 daspò di Crist, e Tacit tal 98), plui tart a lerin in Panonie (plui o mancul la Ongjarie di vuê) e di li, tal 568, si moverin viers la Italie. Rivâts in Friûl, prime di lâ indevant bande sud, il lôr re Alboin al nomene so nevôt Gjisulf duche di chel prin teritori concuistât. Gjisulf, prin duche dal Friûl, si stabilìs a Forum Iulii (Cividât).

I Langobarts si insediarin tes zonis plui fertilis e in particolâr dongje di flums e di grandis viis di comunicazion par difindi vâts, puints e stradis, dispès dongje des popolazions che a jerin za a stâ in chei lûcs, come che a dimostrin i cimitieris dulà che si cjatin sedi rescj langobarts che "romans". Forsit ancje par vie di cualchi inondazion che a vuastà la basse planure furlane, in chest periodi il teritori al fo dal dut disabitât; invezit plui a nord a son documentâts stanziaments langobarts. Un di chescj al è propit a Gonârs.

L'insediament dai Langobarts in Friûl al à determinât un grues cambiament dal pont di viste sociâl, politic e economic: a puartin gnove fuarce e gnûfs stanziaments. Par ce che al rivuarde la gjestion de politiche e des tieris a cjapin il puest dai Romans, ma a diference di ce che a fasevin prime di lôr i nobii langobarts a jerin a vivi su lis lôr tieris e no lis direzevin di lontan. Sul teritori si formin gnûfs centris abitâts, ancje par vuardiâ lis stradis e difindi i dominis langobarts.

Tal 776 a scomence la dominazion dai Francs che e puarte diviers mudaments te organizazion dal teritori, de societât e de economie. Chei sot la dominazion dai Langobarts e dai Francs a son secui caraterizâts di une cierte pâs ma subite dopo al tache il periodi des invasions dai Ongjars (899-952) che a devastin cheste planure, che di chê volte a ven ancje clamade "Vastata Hungarorum".

Riferiments bibliografics

Breve Storia del Friuli / P.S. Leicht. - 4. ed. / con aggiunte a cura di C.G. Mor. - Udine : Libreria Editrice «Aquileia», 1970

Storia del Friuli / Pio Paschini ; 4 ed. a cura di Giuseppe Fornasir. - Udine : Arti Grafiche Friulane, 1990