Ete di mieç
Cetancj reperts langobarts scuvierts te zone tra Porpêt e Gonârs a fasin pensâ a un insediament militâr: di fat a son stadis cjatadis pontis di lance e di frece, spathae, umbons di scût. Une vore interessants a son la spatha cjatade a Gonârs e un umbon di scût, definît "di parade" par vie des decorazions, cjatât a Porpêt e che forsit al jere di un nobil o di un cjâf militâr. Chescj reperts a podaressin jessi de seconde metât dal secul VII. Al è une vore probabil che il sarcofac cjatât tal 1968 tra Gonârs e Favuîs al sedi invezit dal secul VIII. Dentri a jerin i rescj di doi scheletris, forsit om e femine langobarts, e une crôs di bronç une vore interessante. Al somearès che e sedi la crôs di un relicuiari dal tesaur dal Dom di Cividât, e si pense che e puedi jessi il so model. Duncje si ipotize che l'om cjatât a Gonârs al fos un oresin e che la crôs di bronç al fos un esempli de sô art.
I Langobarts a puartin in Friûl gnove fuarce e gnûfs stanziaments. Cussì, ancje tes campagnis ator di Gonârs, Favuîs e Antognan e torne a cjapâ pît la agriculture e, al è une vore probabil, ancje l'artesanât e il cumierç.
Come il rest de Basse furlane, ancje Gonârs al passe de dominazion langobarde a chê dai Francs e infin al subìs lis scorizadis dai Ongjars (899-952). A son propi chestis la cause dal intart e dal degrât de planure furlane di chei secui, cundizions descritis intun document dal 1028 dal imperadôr Corât II che al concêt al Patriarcje di guviernâ chestis zonis che aromai no jerin plui abitadis e dulà che a jerin dome boscs e pustots.
Il periodi patriarcjâl al tache segnât dal intart e de desolazion, ma i Patriarcjis a tornin a popolâ la zone e a inviin un riprese economiche e sociâl in ducj i teritoris dal Friûl sot dal lôr domini. Il patriarcje Popon al fâs ricostruî la basiliche di Aquilee che e ven screade ai 13 di Lui dal 1031. Istituint il cjapitul di Aquilee, i da une part dai teritoris de Glesie di Aquilee, in liste intune bole che e à la stesse date de scree de basiliche. Cheste bole e je il document plui antîc dulà che a vegnin nomenadis lis vilis di Gonârs e di Antognan che però no fasin part de donazion, forsit parcè che a jerin sot la jurisdizion dal cjastiel di Porpêt.
Vie par chescj secui, ven a stâi tra il X e il XI, cul progrès sociâl e economic si definissin lis comunitâts rurâls locâls, ancje chês che vuê a son sul teritori dal comun di Gonârs. La popolazion di cheste aree e veve di jessi sui 200-300 abitants, al è invezit probabil che tal teritori che vuê al è des frazions a fossin di mancul.
Sul finî de ete patriarcjâl, pôcs agns prime che in Friûl a rivassin i Venezians (1420), i abitâts di Antognan e Favuîs a jerin sot la jurisdizion dai conts di Cjistiel Porpêt, Gonârs invezit al dipendeve de podestarie di Maran.