Comune di Gonars

Tal 1420, date che segne l'inizi de ocupazion veneziane in Friûl, Gonârs, Favuîs, Antognan e i lôr cjamps a passin sot dal guvier venit, ancje se in maniere indirete. Di fat la Serenissime e ricognòs la investidure feudâl dal cont di Gurize su Antognan e Favuîs fin ae muart dal ultin cont, invezit Gonârs e la podestarie di Maran a restin sot dal Patriarcjât.

Cuant che in Friûl al scomence il domini de Republiche di Vignesie, sul confin orientâl a sburtin i Turcs. La seconde metât dal secul a sarà segnade propit des invasions dal lôr esercit; une vore griviis a forin lis conseguencis de scorizade dal 1477, cuant che a forin distruts Gonârs e Antognan, dutun cun tantis altris vilis dongje de Stradalte.

In cheste zone la situazion e devente ancjemò plui dure tal 1500 cuant che al mûr Lenart, l'ultin cont de dinastie dai Tirôl Gurize: e scomence une contese violente tra la cjase di Austrie e la Republiche veneziane pal domini de Basse furlane. Tant che erêts, i Austriacs a deventin parons dai bens dai conts di Gurize, intant Vignesie e pretint di guviernâ su chê part di bens che pocjis desenis di agns prime e veve ricognossût tant che concession feudâl ai stes conts di Gurize. Alore e tache une vuere tra Republiche de Serenissime di une bande e Austrie, insieme cun Spagne, France e cualchi princip talian (che a formavin la leghe di Cambrai) di chê altre. Dopo dut un intierçâsi di fats, la situazion e cjate une soluzion definitive cui pats di Noyon dal 1516 e la diete di Worms dal 1521, che, gjavâts i dirits dal Patriarcje, a devin ae Austrie buine part dai teritoris de Basse furlane e fra chei ancje i borcs di Gonârs, Favuîs e Antognan insieme cu lis vilis di Cjistiel, Porpêt, Vilegnove, Cjarisà, Sant Zorç, Noiâr e Cjarlins. Cheste deliberazion no fo metude in vore daurman ma dome tal 1546, cuant che i contrascj tra Vignesie e Austrie a jerin deventâts plui dûrs. La prime e veve tornât a cjapâ la roche di Maran (1542), e la seconde e veve fat sù dongje de roche il presidi di Maranut par controlâ la zone. Sul teritori che vuê al è dal Comun di Gonârs al scomence cussì il guvier austriac che al larà indevant par trê secui e che al varà di patî simpri par vie dai contrascj tra la Serenissime e l'Imperi. Aes cuestions politichis si à di zontâ ancje lis barufis continuis tra paîs confinants ma sot di guviers diferents: lis barufis a tocjavin soredut i dirits di ûs dai passons, des aghis, dai palûts e di ducj i bens comuns. Prin o dopo cheste tension continue e veve di sclopâ, e di fat tal 1615 e tacà une altre vuere tra Vignesie e Austrie: la "vuere di Gardiscje", clamade in cheste maniere parcè che lis operazions militârs si concentrarin tor de fuartece di chê vile. Dopo uns trê agns di scuintris, tal 1618 a Madrid e ven segnade la pâs che e torne a dividi il teritori come che al jere sul inizi dal contindi e e torne a afermâ il domini austriac su Gonârs, Favuîs e Antognan.

Par vie di cheste situazion instabile, tra ‘500 e ‘600 la cundizion economiche e sociâl di cheste aree no je nuie prospare. Lis tassis a cressin, lis fameis cuntun redit medi bas a fasin debits, i bens comunâi un pôc a la volte a vegnin vendûts a pro des fameis nobilis e abenadis: dut chest al mostre che i contadins e i piçui artesans a stan simpri piês. Dome te seconde metât dal sîscent la situazion e va un pôc in miôr, soredut pe introduzion di dôs impuartantis inovazions inte agriculture: l'arlevament dai cavalîrs insieme cu la coltivazion dai morârs di fuee e la coltivazion de blave. Tal zîr di pocjis desenis di agns chestis ativitâts a permetaran che li classis puaris dai nestris paîs a rivin a lâ indevant; massime la blave, che e rindeve une vore di plui dal forment, par trê secui e sarà la base de alimentazion. La prevalence scuasi esclusive di chest gran te alimentazion, che al coventave par tignî lontane la fam, e fasarà che in chestis zonis a sedin tante pelagre e cretinisim, che a tormentaran Gonârs, Favuîs e Antognan fin ai prins dal Nûfcent.

Cun di plui de decjadence e de imobilitât de economie dai secui XVI e XVIII, ancje il podê des istituzions al va al mancul: za dal inizi de dominazion veneziane il patriarcjât al veve pierdût ogni funzion civîl, cierts siei teritoris e jerin controlâts di Vignesie e altris de cjase di Austrie, lis gastaldiis e lis podestariis a jerin deventadis jurisdizions privadis che si passavin dal pari al fi e che a vevin interès cuasi dome familiâr; la fuarce e la libertât des comunitâts rurâls planc a planc a jerin caladis, scjafoiadis dal pês sociâl e economic des fameis dai siôrs.

Tal 1647 Gonârs, Favuîs e Antognan, par volê dal imperadôr Ferdinant II, a jentrin te autonome contee principesche di Gardiscje, che cul 1717 e dipint in maniere direte de cjase di Austrie; tal 1754 cheste e vignarà zontade ae contee di Gurize che e cjaparà il titul di "Contee di Gurize e Gardiscje". In chescj agns a vegnin definîts i confins tra i teritoris di Vignesie e chei de Cjase di Austrie che a cjapavin dentri dut un gredei di jurisdizions e di dirits. Il probleme dai confins tra i teritoris de Republiche e chei dal Imperi, che a levin daûr dai flums e des aghis de zone (in particolâr la Ausse), al esisteve za di plui di doi secui. Un sburt a risolvi chest probleme al rive de sopression dal patriarcjât di Aquilee tal 1751 e de creazion des dôs Arcidiocesis di Gurize e di Udin e la definizion dai teritoris dulà che a varessin esercitât la lôr competence religjose. Une testemoneance concrete dai acuardis de metât dal Sietcent e je la piere confinarie metude sul confin che al divît l'abitât di Gonârs di chel di Morsan tal 1753 e gjavade tal 1808 par ordin dal Dipartiment di Passarian, istituît dai Francês. In dì di vuê e je tignude tal curtîl de canoniche di Gonârs. Su cheste piere e je incidude, par latin, la descrizion de sô funzion: Confin de Austrie Interiôr e dal Friûl Venit, mai segnât dopo de pâs di Worms, metût sot il domini di Marie Taresie imperadore romane simpri auguste, regjine di Ongjarie e di Boemie, Arciduchesse di Austrie e Francesco Laureano dôs di Vignesie, cu la mediazion di Ferdinant Filip cont di Harrsch e Giovanni Donato pe definizion dai confins. 1753. Bisugne precisâ che, al contrari de idee di confin che o vin in dì di vuê, in chê volte spes nol jere stabilît in maniere precise, al è par chest che tra i doi Stâts confinants a jerin simpri conflits.

Cuant che tal 1797 al rive in Friûl Napoleon e come dapardut dulà che a jerin rivâts i francês, a rivin ancje i cambiaments. Il gnûf secul al tache cu la dominazion dai francês, che a guviernaran il Friûl dal 1805 al 1813. Gonârs, Favuîs e Antognan, dopo jessi passâts sot dal distret di Palme e dal dipartiment di Passarian, in pôcs agns a sintin grancj mudaments aministratîfs, politics e sociâi. I trê abitâts a vegnin cjapâts dentri intun unic complès che al è chel dal comun di Gonârs, si fisse la struture che o cognossìn ancje in dì di vuê di un cjâf lûc cu lis sôs frazions, rezût di un sindic e dai conseîrs nomenâts dal prefet dal dipartiment. In chest periodi al ven introdusût il codiç civîl, che al cjape il puest di ducj i dirits e des jurisdizions feudâls, al ven creât un catastic, clamât napoleonic, par une distribuzion plui ecuilibrade des tassis tal teritori e e ven miorade la rêt des stradis, prime tra dutis la Stradalte (clamade ancje "Napoleoniche"), fate plui drete e buine pai trafics.

Cuant che Napoleon al ven batût, ven a stâi tal 1813, al scomence un secont periodi di dominazion austriache che al cjape dentri dut il Friûl. Ai 7 di Avrîl dal 1815, cuntun proclame, al ven istituît il Ream Lombart Venit, che al cjapave dentri ducj i teritoris furlans che a jerin stâts di Vignesie. Chei altris teritoris furlans, za sot de tutele austriache di prime de Rivoluzion francese, dal pont di viste aministratîf a fasaran part dai "Paîs de Corone". Il confin, che al passave dongje di Palme, nol creave nissun divari tra il Ream Lombart Venit a pene nassût e i dominis ereditaris dai Asburc; lis disposizions aministrativis e chês fiscâls a jerin plui o mancul compagnis, la leç comunâl e provinciâl compagne come ancje lis disposizions su la istruzion, la justizie e i oblics militârs.

No cate cheste buine organizazion e une pression fiscâl cetant mancul fuarte di chê dal periodi napoleonic, no si pues dî che chescj teritoris a viodessin di biel voli il domini de Cjase di Austrie. A jerin tantis lis lagnancis e lis protestis e cualchi volte a finivin in rivoltis, ancje armadis. Ducj chescj mudaments politics insieme cuntune schirie di cjaristiis e un trement passaç climatic (il 1816 al fo clamât "l'an cence Istât", e i agns che a vignirin daûr a forin ancjetant frêts e no àn judât la agriculture) a àn puartât dute la regjon a nivei di vite cetant bas, tant e je vere che i agns che a van dal 1813 al 1821 a son stâts clamâts "i agns de grande fan".

Intant e nas la provincie di Udin (1814), che e cjape dentri ancje Gonârs, Favuîs e Antognan prime sot de Contee di Gurize e Gardiscje; un podestât al cjape il puest dal sindic; si puarte insom il catastic inviât dai francês e cussì si fâs une revision e une distribuzion des tassis juste. Il Codiç napoleonic al ven sostituît dal Codiç civîl austriac, par tancj aspiets plui progredît di chel francês, e al restarà in vore fin tal 1871. Soredut si tornin a definî lis aministrazions locâls e provinciâls, e i lôr components a saran sielzûts pal plui tra la classe medie alte dal puest in maniere di fâ governâ i sudits di int che e veve ce fâ cun lôr.

La cundizion economiche e sociâl des classis mediis bassis a va in piês. La ativitât principâl e jere la agriculture, che e ocupave la plui part de popolazion, soredut tant che zornadîrs, metadiaris e fituâi. Chescj a fasevin pats colonics simpri plui dûrs, a dipendevin dai flus variabii de agriculture e cussì di man in man a levin a incressi il numar dai contadins cence tiere che plui indevant a varessin fat nassi il fenomen de emigrazion, evident soredut tacant de seconde metât dal secul. Soredut te Basse furlane i terens e jerin tes mans di grancj proprietaris che ju aministravin cun cjastalts e fatôrs impegnâts a gjestî e a controlâ la ativitât dai contadins pal solit paiâts cul pat di metadie. L'artesanât e la industrie a jerin ativitâts margjinâls che a rispuindevin dome a une bisugne locâl.

Il maljessi che al nas di cheste situazion di puaretât dutun cui ferments indipendentiscj e iredentiscj a alimentin i mots dal 1848, che a cjaparan ancje il Friûl lassant grancj segns soredut te zone di Palme e tai paîs li dongje, e che a saran il segnâl plui evident e significatîf de future unitât de Italie. Tal procès di unificazion i teritoris furlans a àn vût une impuartance strategjiche, dal moment che a jerin une zone di confin. Lu dimostre ancje il fat che il confin tra il Ream di Italie a pene nassût e la cjase di Austrie, fissât il mês di Avost dal 1866, si môf. Ae fin de Tierce vuere di indipendence al jere dilunc di une linie che e passave tra Morsan e Gonârs, tal mês di Otubar di chel stes an al ven mot cualchi chilometri a est di Palme. Tacant di chel moment il teritori che vuê al fâs part dal Comun di Gonârs al devente talian in maniere stabile e al ven a cjatâsi propit sul confin cu la Austrie.

Chest mudament politic profont, acetât cun pôc entusiasim, nol puarte a un grant mudament des cundizions economichis e sociâls de Basse. La plui part de popolazion e lavore ancjemò te agriculture, che però no rive a nudrî dute la popolazion. Cheste situazion e fâs nassi e cressi il fenomen de emigrazion che, tra la fin dal Votcent e la prime metât dal Nûfcent, e viodarà un grant numar di zornadîrs partî par lâ a cirî fortune e lavôr no dome ator pe Europe, ma par dut il mont. Chest al sarà il fenomen plui impuartant dal periodi che al va dal 1866 fin al 1914: a son decenis di pâs che no àn aveniments impuartants e nancje un grant progrès.

I flus migratoris a son pal plui temporanis o stagjonâi, ma cul timp a scomencin a deventâ stabii, soredut chei transoceanics che a puartaran in Friûl un consistent apuart finanziari par vie dai bêçs che a mandin i emigrants. Intant, tai prins agns dal Nûfcent tai teritoris comunâi al tache un ciert svilup dal artesanât e dal cumierç che par Gonârs al vûl dî produzion di scarpis. Par dut il secul XX cheste ativitât, cui siei alts e bas, e sarà un tra i setôrs plui impuartants de economie dal puest parie cu la lavorazion dal fier, dal len, la masanadure, la sartorie; a chestis ativitâts si à di zontâ un bon numar di personis che a fasin i ustîrs e i salsamentârs.