La prime vuere mondiâl
Chest progrès economic za lent, tai doi agns prime de Grande Vuere si ferme. Tra il 1913 e il 1915 la crisi e je gjenerâl: i pôcs cumierçs cun paîs forescj a son blocâts, la agriculture no je bute ben, lis pocjis iniziativis che i consorzis privâts de Basse a promovin, tant che bonificâ e lavorâ terens gnûfs, a jentrin intune suaze di cundizions economichis e sociâls masse brutis par podê jessi modificadis in pôc timp. Chest cuadri aprossimatîf al presente la situazion di dut il Friûl e soredut de Basse, aromai dongje de prime vuere mondiâl. Cuant che e tache la vuere, la int e je une vore contrarie, e le considere tant che une "tremende calamitât" par un teritori puar, simpri stât tiere di passaç e cjamp di bataie di cetancj esercits. Propite sul confin tra Friûl e Austrie si combatarà cualchidune des batais plui impuartantis di dut il conflit.
Sul teritori di Gonârs a saran fats sù un piçul ospedâl militâr e un cjamp di aviazion che al sarà base di poie par impuartantis azions dai aeroplans militârs talians in teritori austriac. Une di chestis e je ricuardade a Gonârs cul monument ae Aviazion: l'imponent basrilêf di bronç, fat tal 1968 dal artist furlan Gigi Di Luca, al ricuarde la azion di vuere dai 18 di Fevrâr dal 1916 dal Maiôr pilote Oreste Salomone, l'unic restât dal ecuipaç dal so bombardîr "Caproni", che al fo bon di tornâ jù di emergjence tal cjamp di aviazion di Gonârs.
La disfate di Cjaurêt dal mês di Otubar dal 1917, che e metarà dut il teritori furlan tes mans dai esercits dai Imperis Centrâi, e e aumentarà in maniere esagjerade i efiets za tragjics de vuere. A Gonârs al è un monument pai muarts inte prime vuere mondiâl, fat tal 1936.
La fin dal conflit e lasse ai furlans, scunîts e scuintiâts de vuere, un teritori fiscât: il 50% de superficie agrarie no si pues doprâ, il procès di industrializazion interot e ripuartât ai nivei di plui di trente agns prime, la popolazion decimade, cence lis fassis di lavoradôrs plui produtîfs, e rassegnade ae disocupazion o ae emigrazion, stant che prospetivis di lavôr cuasi no ‘nd jerin. Il comun di Gonârs nol è une ecezion, e se di une bande al viôt svilupâsi cualchi piçule aziende artesane, di chê altre al patìs il fenomen de emigrazion. Ma la fin dal conflit e puarte grancj mudaments sociâi, prin tra ducj il sfantâsi dal mont dal secul a pene passât cun ducj i siei privileçs e lis sôs prerogativis, chest soredut tes zonis agriculis de Basse dulà che, cul sburt dai lavoradôrs catolics e socialiscj, si abolissin la metadie e ducj i pats colonics de stesse sorte, cussì dûrs pal mont dai contadins e dai zornadîrs.