Il fassisim
I agns vincj dal Nûfcent a viodin nassi e consolidâsi il fassisim e il famôs discors che Mussolini al fasè a Udin il mês di Setembar dal '22. Cun chel an il partît dal Duce al metarà in vore un incentrament dal podê che al puartarà ae afermazion dal stât totalitari, fondât suntune gjestion curiente dal consens e su la repression di dutis lis dinamichis autonomistichis locâls che il gnûf stât autarchic e centralizât al cjaparà dentri e al scjafoiarà. Intal periodi fassist i piçui proprietaris de planure furlane, in particolâr chei de Basse, a son tant puars che a scugnin ipotecâ lis lôr misaris tieris, e la emigrazion e torne a jessi un fatôr fondamentâl de vite economiche di dute la regjon. Dal rest a vegnin fatis bonifichis, realizadis oparis publichis che a rivuardin la viabilitât e i bacins idrografics ma al fo fat pôc pe promozion de industrie furlane che di râr e le plui insù dal nivel di piçule aziende, come che a dimostrin lis ativitâts artesanâls nassudis in chê volte sul teritori di Gonârs e dai comuns convicins. Un câs dut par so cont al è chel dal intervent dal Stât cui siei capitâi par realizâ il stabiliment di Tor di Zuin che par dut il secul al à cjapât sù lavoranzie di Gonârs, Favuîs e Antognan.
La plui part de opinion publiche e fo cuintri de jentrade in vuere de Italie di Mussolini. Chest riviel cuintri de azion beliche e dal partît fassist dopo dai 8 di Setembar dal 1943 si slargjà in maniere imburide cu la insurezion partesane, cussì fuarte su dut il teritori furlan, e cul moviment de Resistence, sostignût dal consens e de colaborazion de plui part de popolazion. Par ce che al rivuarde in particolâr Gonârs e il so teritori, i fats de seconde vuere mondiâl a son ancjemò plui peâts ae vite de comunitât dal puest. Tal mês di Dicembar dal 1941 il regjim fassist al met sù un cjamp di concentrament, dulà che, tacant de Vierte dal 1942, a vegnin internâts miârs di civîi puartâts vie dai teritoris de Jugoslavie ocupâts dal esercit talian.