Comune di Gonars

Par ce che al rivuarde in particolâr Gonârs e il so teritori, i fats de seconde vuere mondiâl a son ancjemò plui peâts ae vite de comunitât dal puest. Tal mês di Dicembar dal 1941 il regjim fassist al met sù un cjamp di concentrament, dulà che,  tacant de Vierte dal 1942, a vegnin internâts miârs di civîi puartâts vie dai teritoris de Jugoslavie ocupâts dal esercit talian.

Il cjamp di Gonârs, fat sù a pene fûr dal paîs, dongje de "Napoleoniche", al jere formât di dôs centris dividudis plui o mancul une un chilometri di chê altre, il cjamp A e il cjamp B, li che a jerin trê setôrs, Alfa, Beta e Gamma. Ator ator i coreve fîl spinât alt, cun tors di vuardie cun metraiis e rifletôrs potents che i fasevin lûs tant che di dì.

Il cjamp al jere stât fat sù te Sierade dal 1941 in prevision che a rivassin presonîrs di vuere rus, ma nol è mai stât doprât cun chest fin. Te Vierte dal 1942 invezit al è stât destinât pal internament dai civîi di chê che si veve clamade "Provincia italiana di Lubiana", depuartâts dal esercit talian par meti in vore la famose Circolâr 3C dal gjenerâl Roatta, comandant de II Armade, che e fissave lis misuris repressivis di tignî tai teritoris ocupâts e anetûts de Italie dopo dal atac nazifassist cuintri de Jugoslavie ai 6 di Avrîl dal 1941.

Lis dôs massimis autoritâts civîls e militârs de provincie di Lubiane, l'Alt Comissari Emilio Grazioli, scuadrist dai prins, e il gjenerâl Mario Robotti, comandant dal XI Cuarp di Armade, a àn metût in vore cun precision e cence dûl lis misuris repressivis: ostaçs fusilâts, paîs brusâts, popolazions interiis depuartadis. Te gnot tra i 22 e i 23 di Fevrâr dal 1942 la citât di Lubiane e je stade sierade dute di fîl spinât, ducj i oms in etât maiôr a son stâts arestâts, passâts par controi, e la plui part di lôr ju àn destinâts a sei internâts. In curt a àn patît chel tratament istès ancje chês altris citâts de "provincie".

I arestâts a son stâts puartâts tal cjamp di concentrament di Gonârs, che tal Istât dal '42 al tignive za plui di 6000 internâts, tant parsore di ce che al varès podût acetâ (al jere fat par mancul di 3000 personis). Par vie che e jere masse int, che lis cundizions igjienichis a jerin insuficientis e che la alimentazion e jere misare, in curt si son slargjadis plui malatiis, par esempli la dissentarie, che e à tacât a fâ murî i prins di lôr.

In cheste dade di timp tal cjamp a jerin concentrâts inteletuâi, students, insegnants, artesans, operaris, vâl a dî ducj chei che si calcolave che a varessin podût oponisi cuintri de ocupazion, e tra di lôr a jerin ancje tancj artiscj che ae presonie tal cjamp i àn dedicât tantis des lôr oparis. Sot pseudonim a jerin internâts ancje esponents dal Front di Liberazion sloven, che a saressin deventâts plui indevant dirigjents de Resistence jugoslave. Cualchidun di lôr, tal Avost dal 1942, al à vût organizât une evasion dal cjamp, cu la plui classiche des manieris: sgjavant une galarie lungje sot de barache XXII.

Dopo de evasion, la plui part dai internâts restâts e le àn trasferide in altris cjamps che intant a jerin stâts vierts in Italie, massime a Monigo di Treviso, a Chiesanuova di Padova e a Renicci di Anghiari in provincie di Arezzo e po dopo a Visc, a pôcs chilometris di Gonârs. Ma il cjamp di Gonârs si è jemplât in curt di une gnove fate di presonîrs: oms, feminis, viei e fruts depuartâts dai paîs dal Gorski Kotar, la regjon des monts a nordest di Flum di Istrie, e prima sierâts a Kampor, te isule di Rab. Chi tal Lui dal 1942 il gjenerâl Roatta al veve prontât un cjamp di concentrament une vore grant, che al veve di jessi un dai struments plui impuartants de "bonifiche etniche" dai teritoris jugoslâfs ocupâts programade dal regjim fassist. Tal Istât dal 1942 a son stâts sierâts dentri plui di 10.000 slovens e cravuats, in cundizions di vite che a fasevin pôre, in tendis fruiadis, cence servizis igjienics e cence cusinis. Di fat i cjamps di concentrament par jugoslâfs a jerin organizâts dai comandants dal esercit talian daûr dal principi presentât dal gjenerâl Gambara: "Campo di concentramento non è campo di ingrassamento. Individuo malato = individuo che sta tranquillo". In curt la mortalitât a Rab e je rivade a nivei une vore alts e il gjenerâl Roatta al à decidût il trasferiment di feminis, viei e fruts a Gonârs, li che tra la Sierade e l'Invier dal 1942-43 a son rivâts miârs di persons za une vore debilitadis. Cussì, ancje se al è stât l'impegn uman di cualchidun dai uficiâi e dai soldâts de vuardie, tant che il miedi Mario Cordaro, tal cjamp di Gonârs a son muarts, di fam e di malatie, plui di 500 di lôr. Almancul 70 a jerin frunts cun mancul di un an, nassûts e muarts in cjamp di concentament.

Il cjamp di Gonârs, come ducj chei altris cjamps fassiscj par internâts jugoslâfs, al à funzionât fintremai al Setembar dal 1943, cuant che cu la capitolazion dal esercit talian la trupe di vuardie e je scjampade e i internâts a son stâts lassâts libars di lâ vie. Tai mês dopo la popolazion di Gonârs e à disfat il cjamp doprant il materiâl par altris costruzions, tant che la scuelute dai fruts, e cussì vuê nol reste plui nuie des struturis dal cjamp.

In ricuart di chescj fats tal 1973, par iniziative des autoritâts jugoslavis, il scultôr Miodrag Živković al creà un sacrari sistemât tal cimitieri di Gonârs dulà che, in dôs criptis, a forin trasferîts i rescj di 453 citadins slovens e cravuats internâts tal cjamp di concentrament di Gonârs vie pe II vuere mondiâl.