Comune di Gonars

E fo fate sù tra il 1970 e il 1972, su progjet dal architet Giacomo Della Mea, ta la stesse aree dulà che prime e jere une glesie dal 1750 cirche, demolide tal 1962 parcè che aromai e jere malsigure. La planimetrie di cheste glesie no rispuint a lis regulis dal Concili Vatican II, che a ricognossin la bisugne di svicinâ la glesie e i fedêi e a previodin, ta la architeture religjose, che si movedi l’altâr viers la zone che par tradizion e je risiervade ai fedêi. Ca, navade e presbiteri si unissin intun spazi sôl. La glesie e à une forme circolâr, un diametri interni di 30,50 m e une altece massime di 16 m. Dentri, l’element che le caraterize a son lis dôs colonis che a tegnin sù il tet. E je degne di jessi nomenade la lastre metude parsore da la jentrade principâl, realizade di Arrigo Poz cu la tecniche da la leadure a plomp: e rapresente la Vergjine cul Frut e i doi Sants Patronis: Canzian e Roc.

Dal 2001, la glesie e conserve une relicuie dal patroni San Canzian, donât da la parochie di San Canzian dal Lusinç. San Canzian al è un martar aquileiês. Roman, al faseve part da la gens Cantia, famee siore e potente presinte a Aquilee e tai teritoris dongje. Daûr da la tradizion, tal 303, tal timp da la persecuzion di Dioclezian, i trê fradis Canzio, Canzian e Canzianile a forin martirizâts dongje San Canzian dal Lusinç, dulà che di fat a son stâts cjatâts i rescj da la basiliche nomenade a lôr. La intitolazion a chest sant (la devozion tai siei confronts si difondè subite daspò da la sô muart), e fâs pensâ a origjins pluitost antighis par la glesie di Gonârs, ancje se lis primis informazions di une glesie di san Canzian a Gonârs a van indaûr dome al secul XVI.

E je a Gonârs, in place Giulio Cesare. N. 24 dal stradari.