Club Alcoliscj in Tratament n. 298 “Vita Serena”
ASSOCIAZION: Club Alcoliscj in Tratament n. 298 “Vita Serena”
PRESIDENT: Sergio Di Benedetto
Pueste eletroniche: vitaserena.gonars@gmail.com
La Associazion Club Alcoliscj in Tratament Palmarine (ACAT Palmarine), associazion che e à dentri ancje il club 298 di Gonârs, e à une sede gnove li des vecjis scuelis elementârs di Clauian (vie Borc San Martin 33050 Trivignan).
Ducj i martars, des 17.00 aes 19.00, la sede e je vierte a la int par ducj chei che a àn voie di vê plui informazions su la vite da la associazion, su lis ativitâts dai club o ancje dome par un salût.
STORIE E FINALITÂT
Il Club Alcoliscj in Tratament (CAT) n. 298 “Vita serena” di Gonârs al è un dai cirche 2400 CAT che al dì di vuê a son in Italie. Il prin Club al è stât fondât a Triest tal 1979 da une idee dal prof. Hudolin.
Il club al è la clâf fondamentâl tal svicinament ecologjic sociâl adotât par la lote cuintri dal alcolisim.
Al è costituît di un massim di dodis fameis che a àn in comun la presince di problemis leâts al alcul e/o tossicodipendencis.
La finalitât dal Club e je chê di scomençâ un percors di cambiament dal compuartament dal alcolist e da la sô famee tai confronts dal bevi e favorî une lôr progressive cressite e maturazion di slargjâ a la coletivitât dulà che a vivin e a lavorin.
Il club di Gonârs si cjate une volte par setemane, il martars di sere, li dal Salot da la palestre in vie Venezia 1. Lis seradis a son moderadis dal “servidôr insegnant” (Milena). I incuintris a scomencin aes 20:00 e a van indenant une ore e mieze.
Lis regolis di funzionament, pluitost semplicis, a rivuardin la puntualitât tal scomençâ lis sentadis di club, la proibizion di fumâ tal timp de sentade, la nassite di doi club gnûfs cuant che e rive la famee numar tredis, la riservatece.
La jentrade di fameis gnovis tal club al pues jessi spontani, mediât dal miedi di base, dal servizi public teritoriâl o dal ospedâl o di cualsisedi altre istituzion che e sedi presinte sul teritori.
Tal club ognidun al è responsabil di se stes e dal so percors di cambiament (che al va indenant par dute la vite), cussì come che ancje il club al è responsabil di se stes, cence deleghis di nissune fate.